AN JINJINAWA SHUGABAN IZALA NA ƘASA BISA ƘOƘARINSA NA HAƊAKAN AHLUS SUNNAH NA DUNIYA DA SAMARMA KUNGIYAR HANYOYIN DOGARO DA KAI. Daga Abdullahi Salisu Faru An yabama Shugaban kungiyar nan ta wa’azin Musulunci watau Jama’atu Izalatil Bidi’ah Wa Iƙamatis Sunnah Sheikh Abdullahi Bala Lau akan ƙoƙarinsa na haɗa kan musulmi Ahlus Sunnah da samar da cigaba mai ɗorewa ga kungiyar. Shugaban Izala na ƙaramar hukumar mulkin Maradun da ke jahar Zamfara kuma mataimakin shugaban kungiyar na jahar na ɗaya Alh. Abubakar Aliyu Ɗan Madamin Maradun yayi wannan yabo a wani rubutu da yayi a shafinsa na Facebook. Ɗan Madamin na Maradun ya ƙara da cewa “Tabbas ƙungiyar Izala (Jibwis) ta samu gagarumin cigaba sanadiyyar shugabanci mai inganci a lokacin Sheikh Bala Lau”, Ɗan Madami ya zayyano wasu ayyuka waɗanda yace kaɗan ne daga cigaban da shugaba Bala Lau ya kawo a lokacin jagorancinsa ciki har da haɗin kan musulmi Ahlus Sunnah na Africa da turai gaba ɗaya inda ake magana da murya ɗaya. Alh. Abubakar Aliyu Maradun Danmadami ya ƙara da cewa ” A lokacin shugabancin Bala Lau ne aka kashe kungiyanci a cikin Izala tare da buɗe ƙofofi ga duk Ahlus Sunnah ko ina yake, musamman ɗaliban da suka kammala karatu a jami’o’in musulunci da ke Madina, Masar, Malesiya, Sudan, Uganda da sauran ɗaliban ilimi daga sassa daban daban waɗanda suka kammala jami’o’in Musulunci”. Ɗan Madamin Maradun yace yanzu al’umma suna amfanuwa ga Da’awar Sunnah ta hanyar sauraren tashoshin da Izala ta buɗe wanda wannan cigaba ne mai ɗorewa tare da samarma ƙungiyar da kuɗaɗen shiga. Alh. Abubakar Aliyu ya godewa wasu daga cikin manyan malaman sunnah waɗanda suka bada gudunmawa sosai wajen samun nasara ga shugabancin Sheikh Bala Lau, ya ƙara da cewa, girman Sheikh Bala Lau da suka yi bai hana su cigaba da yi mashi biyayya ba. Yayi addu’ar neman gafara ga wasu malamai waɗanda suka rigamu gidan gaskiya irinsu Sheikh Rabi’u Daura, Dr Alhassan Sa’id Adam Jos, Sheikh Jafar Mahamoud Adam Kano, Sheikh Abubakar Mahamoud Gummi, Sheikh Bawa Main Shinkafa, Sheikh Sma’ila Idris Jos, Alh. Musa Mai Gandu da sauran malamai. Alh. Abubakar Aliyu Ɗan Madamin Maradun yayi addu’ar neman Allah ya ƙara ba Sheikh Bala Lau hangen nesa da tunanin cigaba da zaƙulo hanyoyin cigaban wannan kungiya ta mu mai albarka.
Thank's for reading my article AN JINJINAWA SHEIKH BALA LAU
Created at 2018-03-08 00:48:44
Tags: LABARAI

0 Rate upStar
Share: